Янка Купала

Зноў будзем шчасце мець і волю

 

Лютуе Гітлер ашалелы,
Яму ў Германіі зацесна,
Яму пад ногі дай свет цэлы,
Хай гіне ў муках свет балесных.

Ускормлен мясам чалавечым,
Крывёй народнаю скупаны,
Народам волю абязвечыў,
Лютуе кат пад звон кайданаў.

На Беларусь, маю радзіму,
Як шакал, рынуўся галодны,
На Беларусь, што леты, зімы
Жыла шчасліваю, свабоднай.

І рэжа, вешае нявінных
Бацькоў, дзяцей і старцаў кволых.

Беларускім партызанам

 
Партызаны, партызаны, 
    Беларускія сыны! 
За няволю, за кайданы 
Рэжце гітлерцаў паганых, 
    Каб не ўскрэслі век яны. 

На руінах, папялішчах, 
    На крывавых іх слядах 
Хай груган іх косці ліча, 
На бяседу соваў кліча 
    Баль спраўляць на іх касцях.